Steptrening!

For eit par veker sidan sette me oss ned med kalenderen for å få litt oversikt og planlegga helgene framover. Me fekk litt hakaslepp då det viste seg at det ikkje var ei einaste ledig helg før jul då det gjekk an å reisa nordover og jobba. Eldsteguten begynte på handball i haust, og trivst kjempegodt med det. Litt frustrerande for oss at alle kampar blir spela i helger, men me er av oppfatninga at "er du med på laget, så stiller du på kamp". Me blei likevel ikkje særleg leie oss då me fekk beskjed om at kampane denne helga var avlyste. Me snudde oss rundt i ein rasande fart, og vips blei det jobbehelg på hytta.

BesteUnn hadde planar for dei tre røvarane våre, og dermed fekk mamma og pappa jobba samanhengande begge to både i går og i dag. Kan tru me fekk gjort mykje!

Me er stort sett ferdige med tak og vegger i soveromsdelen, så denne helga begynte me på taket i kjøkken/stovedelen.

Her begynte me. Sånn såg det ut i går morges.

Plastic, fantastic!

Der var me oppe ved dragaren.

På med lekter...

...og så panel.

Så langt kom me i går, før me måtte ein tur til by'n etter meir lekter, stifter og dykkertar.

Her er me komne heilt opp til dragaren med panel, og er begynt med plast på andre sida.

...og så langt kom me med panel i dag. Det gjekk noko seinare når ein måtte skråskjera i eine enden...

Me er strålande nøgde med eigen innsats, og kjenner me har jobba. Det har blitt mykje klatring i stigar denne helga, så låra mine, saman med høgdeskrekken, har fått kjørt seg!

Direkte på latsida har dei ikkje ligge oppe på Tveit heller. I går sto far min på julemarknad på Bømlo, mens besteUnn hadde heile banden vår med seg og baka pepparkaker og ikkje mindre enn tre kransekaker! I dag var eldstemann med bestefar og pressa eplejuice, mens dei to andre var ein tur nede ved bryggene i lag med besteUnn. Og så har me kome til dekka bord til alle måltider. Eit hotell me ikkje vil anbefala til nokon, for me vil ha det heilt for oss sjølve... ;-)

Nå tippar eg neste høvet til ein tur nordover blir i romjula. Då ventar enda meir panel som må skråskjerast...