Gnistrande vinterver - klart, og godt med minusgrader, både ute og inni hytta. Første gongen eg har jobba inni hytta med dress og selbuvottar på...
(Fotograf Astrid, 2 år og 4 månader...)
Eit gammalt munnhell seier at god reidskap er halve arbeidet. Eit anna seier at god planleggjing er halve arbeidet. Dersom ein då brukar god gammal Erasmus Montanus - logikk, skulle det tilseia at med god reidskap og god planleggjing, treng ein ikkje gjera noko som helst...
Me begynner å bli ganske godt utrusta når det gjeld reidskap. Dessverre har me litt å gå på når det gjeld planleggjing før me kan setja oss på rumpa og gjera ingenting. Denne helga er eit godt døme i så måte. Me hadde handla materialer til kubbing mellom stenderverk der kjøkkeninnreidinga skal plasserast, og var klare til innsats. Dei tre musketterane var godt i gang med skogsarbeid i lag med bestene på Tveit, så alt låg til rette for samanhengande og effektiv jobbing. Etter ein time konstaterte me at me var tomme for skruar...
Biltema to the rescue. Minstesnupps var med på Haugesundstur og fekk seg ein god dupp i bilen, mens dei to eldste var med beste-Unn på isen. Det blei etterpå rapportert om at beste-Unn blei grisetakla av eldstemann, som har vore innom innebandyklubben på Hommersåk og lært seg eitt og anna, men alle såg gudskjelov like heile ut då dei kom tilbake!
Litt fekk me nå gjort denne helga, sjølv om planleggjinga kunne vore bedre. Me fekk kubba i og plata veggene i kjøkkenkroken. Det blir lysare og trivelegare for kvar veggplate som kjem opp, syns eg. Så fekk me teke ein god ryddesjau, slik at røyrleggjaronkelen min skal sleppa å snoffla i altfor mykje når han kjem til veka.
Nå går diskusjonen i heimen om kor på kalenderen Pål skal leggja dei tilmålte ferievekene dette året. Vinterferie eller ikkje vinterferie, det er det eksistensielle spørsmålet...
